Eçlege:
- 400 g it, borgan
- 1 sugan, vaklap turalgan
- 2 bk toz
- 1 bk borıç
- beraz su, kaynatıp suıngan
Sugannı vak kına tura da, borgan itkä sal. Kaynatıp suıngan sunı, toz häm borıçnı östä. Barısın da bergä yahşı bolgat. Kamırın bas.
Kamırı:
- 2 dl söt, cılı
- 1 yomırka
- beraz toz
- 7 dl boday onı
Kızdırıp peşerü öçen üsemlek mayı, mäsälän, aybagar (könbagış) mayı. Sötne beraz cılıt. Yakınça 36-37 däräcä, kulıñ belän ber cılılıkta. Sötkä ber yomırka sıt häm beraz toz sal. Boday onın östä dä, kamırnı yahşı gına basıp üzlät. Kamır baytak katı bulırga tiyeş. Östen sölge belän kapla da, 10-15 min yal itter.
Yahşı üzlätkän kamırnı dürt kisäkkä bül. Kisäklärne ozın baton sıman ävälä, diametrı yakınça 4-5 cm. Ävälägän batonı 2-3 cm buşlık kalın kisäklärgä kis. Kamır kisäklären kulıñda tägärätep ävälä. Alardan onlagan kuna östendä tügäräk cäymälär uklaula, yakınça 10-15 cm diametrı.
Cäymäneñ urtasına it sal da, itne pıçak belän tigezlä. Cäymäneñ kırıyına börü öçen 2-3 cm buş kaldır. Cäymäneñ kırıyınnan barmaklarıñ belän kütärep tot. Vak kına börep çık. Börgändä pärämäçneñ urtasında keçkenä tişek kaldır.
Pärämäçlärne kaynar üsemlek mayına salıp kızdır. Tişekle yakların aska karatıp tabaga sal da, kızargaç äyländer. Tabadagı may pärämäçneñ urta biyeklegenä kadär bulsın (may eçenä batırma). İke yagı da kızarıp peşkäç pärämäçlär äzer.
Pärämäç tabınga şurba belän kaynar kileş birelä. Anıñ yanında katık, tozlı kıyar, çögender, hardal (gärçiçä), narat ciläk kaynatması h.b.ş. birelä. Şurba belän pärämäç tagın da läzzätleräk bula.
Şurbası:
- 1 dl kaynar su
- toz häm borıç
- sarı may
Pärämäçlärne peşkän yäki çi kileş tuñdırırga da mömkin.
Tämle bulsın!
Kıskartmalarga añlatmalar:
- g gramm
- bk bal kaşıgı
- dl deziliträ
Räsemnär Fazile Nasretdin
