Bügen çäyhanädä çäy yanında pärämäç birelä! Pärämäçne belmägän yäki pärämäç aşamagan tatar dönyada bar mikän? Bik ışanmıym. Tatarlarga, bigräk tä mişärlärgä, ütätanış bulsa da, küplär äle bu läzzätle rizıknı belmilär. Ul älegä käbap, pizzalar kebek dönyaga cäyelmägän, läkin tatarlar belän aralaşkan keşelär, ägär dä pärämäçne ber tämlägän bulsalar, bu rizıknı onıtmıylar.
Elekke zamanda tatar ailälärendä, miña kalsa, här atna ahırı pärämäç äzerlilär ide. Bu turıda uylaganda äti-äni belän bergäläp pärämäç yasaular küz aldıma kilä. — Äni kamır basa, äti lıgır-lıgır söyli-söyli sugan turıy, borgan itne tozlıy, tozı citteme ikän dip kat-kat tämläp karıy. Annarı inde kamır häm it äzer bulgaç rät miña da kilä. Äni uklau belän tügäräk cäymälär tägärätä, äti iten cäyä, ä min pärämäçlärne börä başlıym. — İten beraz kübräk kuy, bik zur tişek kaldırma, kamırı kalın bulıp kalmasın kebek kiñäşlär äni gel birep tora. Şunda inde pärämäçneñ börüe turında törle hikmätlär açıklana. Beräü börüne bu yaktan başlıy, beräü tagın ikençe yaktan başlıy ikän. Beräüneke bik yämsez bula, ä beräve bik tä matur börä ikän. — Tabada kızganda barısı da matur bula, dip äbi yaktan kıçkıra.
Tabında pärämäç yanında şurba, hardal, katık, tozlagan kıyar yäki tomat birelä — canıñ ni teli, şunı östälgä kuyasıñ inde! Bezneñ öydä pärämäçne izgän şikärlägän narat ciläge belän aşarga yaratuçılar bar. Bu inde finnärdän yabışkan adätter! Dönyanıñ törle yaklarında törleçä aşarga yaratalar. Amerikada ketçup yäki soya belän, ä Australiyädä çili sousı belän aşıylar dip beläm. Läkin berençe pärämäçne kem yasaganın belü kızık bulır ide.